Act 25 | MMX | STEP | Pestas ga rupot go Sisaria, la melemu at lavantun aleng ga volo i, neni ga vas kaxat me go Sisaria la ga rupot to Jerusalem.

Acts 25

Pol Ga Sing Do Dina Lox Aonon I Uto Saparap Ne Kaisar

1 Pestas ga rupot go Sisaria, la melemu at lavantun aleng ga volo i, neni ga vas kaxat me go Sisaria la ga rupot to Jerusalem. 2 Mo go lavaeme silok la luvuttadi amgomgo at leme Judaia diga lok li levelinga atdi mumu ne Pol. 3 Diga sing lolos ne Pestas kusu na lok tavanga avukat tidi la na lox aonon ne Pol uto Jerusalem, mila diga lok li vam levelinga do diba sev amer i do neni na vas polo go at langa. 4 Pestas ga vorang i xeretna, “Pol mo i nemen at loxokoxo to Sisaria, la nenia axa abamlong soso bok ugo. 5 Mina riki tentaba at luvuttadi amgomgo atnimi xusu dinat pas uto Sisaria eburu minia la dina lok li lavapaase mumu mo laradi go, mo do neni gara lok pam tavanga xapmek.”

6 Pestas ga nemen eburu minedi at lavanuan aleng kopla i sangaun aleng, la neni gamlong uto Sisaria. Ap mo lara laaleng melemu ni gat kis to at loxot tongtonga linga; la ga tong mu ri ne Pol kusu na beles uto xeneng saparav i. 7 Pol ga rupot, la leme Judaia no diga vas kaxat boro Jerusalem diga ru xangkan i la diga lok li laxampapaase lolos mumu i; ketla kopmen di goxo lox asuusu i do levelinga atdi ga ruturun.

8 La ne Pol ga lok keretna, “Axo lok kapmek tempanga mumu Lenavolo at leme Judaia, kopla loogu laplavang kopla at ne Kaisar.”

9 Pestas ga vara i do na lox amomo leme Judaia, kuren la ni ga sue ne Pol, “U vara box i do unat pas uto Jerusalem la una ru ro melamgo rax e la nia ana ronga na levelinga di lok li i ram?”

10 Pol ga lok, “A tu na de melamgo at loxot tongtonga linga at ne Kaisar; at na loxot mun miba ronga linga rak. A goxo lok kapmek tempanga at leme Judaia; kerekngan nenu ukleklen avukat tinotno i. 11 Dola nia agara los polo vam Lenavolo la agara lok pam tavanga xusu nia anaba met nov i, i lox avukat mene; a noxo sing do aba sixiro basinge i. Ket do na levelinga di lok li i rak kopmen na ruturun, ixo epovo do tara na song araba ia uto atdi; a vara i do una lox aonon ia uto at ne Kaisar.”

12 Pestas ga epaase eburu mi limixin papaase ren la ni ga lok, “Ura sing pam do ubat pas uto at ne Kaisar, kuren la nenu uba vot posiga i.”

Pestas Ga Soxomus Lavapaase Mumu Ne Pol

13 Melemu at lentaba levenaleng gara volo la loorong silok, ne Agripa eburu mi neinen, laasen teren ne Benis duga rupot to Sisaria xusu duna ven ti ne Pestas la kusu duna vaase momo rin. 14 Duga nemen go Sisaria at levenaleng buaang, la ne Pestas ga paase mumu ne Pol ti mo loorong silok keretna, “Lara laradi i nemen at loxokoxo, no ne Pelik ga on basinge i. 15 Nia agat pas uto Jerusalem, la lavamaasa silok la loxongkulao silok at leme Judaia diga lok li levempapaase rin la diga sing ia xusu ana lok li lumumuat teren.

16 Ketla nia aga tong i ridi do nedik limixin boro Rom kopmen dik tana song araba gamasa taradi uto ri lanmet. Neni naba epen etang mi mo laradi nedu gi edak, kusu neni bok naba ronga levelinga ren la na vorang i. 17 Mo luvuttadi silok diga rupot de, la nia xopmen a goxok lok sila; ap mo mun lara laaleng melemu aga xis to at loxot tongtonga linga la aga tong i ri laradi esep kusu na lox abeles ne Pol ukeneng. 18 La nedi mo limixin diga lok li i at lavapaase; diga xatu upana, kusu dina vaase; la nia aga nua i do diba vaase mu i mi taxapmek. Ketla di goxo lox i. 19 Diga ruuna mun levesusue eburu min mumu leventaangas at lotu atnedi la mumu bok lara laradi laasen teren ne Iesu, no gara met pam; ne Pol ga lok do neni mo i rooro. 20 A goxo epovo do anaba lok ka tevelinga mumu na lavanga; kuren la aga sing ne Pol kusu ni nat pas uto Jerusalem, la ana ronga mo lavapaase ren go. 21 Ketla ne Pol ga sing do ni na nemen maxopok at loklok tatao rak na de Sisaria, la ne Kaisar axa naba ronga linga ren. Kuren la aga tong i ri luvuttadi esep kusu dina lok tatao avukar i se nia aba lox aonon i uto at ne Kaisar.”

22 Agripa ga lok ti ne Pestas, “A vara i do nenia xa aba ronga linga bok ap mo laradi.”

Pestas ga vorang i xeretna, “Uba ronga linga ren kantamak.”

23 Kuren la ap mo laaleng melemu Agripa la ne Benis duga rupot mi lisinang avukat atdu, la limixin diga lok ngangao aleng atdu. La duga beles to xeneng at loxot tongtonga linga ua luvuttadi amgomgo at limixin esep la limixin silok ap mo lemenemen digat kis tangais i ve. La ne Pestas ga tong mu ri ne Pol la limixin esep diga lox abeles i ukeneng.

24 Pestas ga lok, “Loorong silok ne Agripa, la nemi axap mik lox eburu minama; mina ven na laradi ne Pol! Limixin me Judaia nade la boro bok Jerusalem diga raba linga ia mumu i. Diga paase lolos do ni naba met. 25 Ketla a goxo vuse ka tempanga do ni ga lok kapmex i xusu ni ba met nov i. Ketla neni xa ga sing ti ne Kaisar; kuren la nia a doma li vam i xusu ana sak tiki ne Pol uto saparav i. 26 Ketla axo vuse ka tevelinga loklox axasep teren kusu ana malagan i uto ri leeme gomgo atdik ne Kaisar. Kuren la ana lok li i uto melamgo atnimi la to melamgo ram, ne Agripa! Kuren la, melemu at na lavapaase, aba malagan tevelinga. 27 Mila ixok mokso do ana riki gamasa taradi xokoxo la xopmen tavapaase axasep ti levelinga diga lok li i ren.”